Húðflúrferðamennska ryður sér til rúms á Suðurlandi

Stundum skilur upplifun eftir sig spor. Og á Suðurlandi hefur ein menningarupplifun einmitt gert það — á óvæntan og ógleymanlegan hátt. Þrír erlendir gestir upplifðu nýlega Víkingaveisluna hjá Caves of Hella og Hótel Rangá í einum af fornu manngerðu hellunum á Hellu. Veislurnar eru haldnar við kertaljós og um leið gestirnir gæða sér á dýrindis réttum úr staðbundnu hráefni eru þeir leiddir í gegnum sögu svæðisins í tíma og rúmi. Upplifunin varð ansi mögnuð og talaði hún beint til þeirra- dýpra en nokkur bjóst við.

09.01.2026

Víkingaveisla Hótel Rangár og Caves of Hella.
Ljósm. Ingibjörg Friðriksdóttir

Daginn eftir leituðu þau til húðflúrara á svæðinu og ákváðu að fá sér sama húðflúrið af einum hellanna. Það var þeirra leið til að eiga varanlega minningu um kvöld sem þau vildu aldrei gleyma.

Fréttirnar komu staðarhöldurum vel á óvart.

„Ég missti næstum því andann þegar ég las tölvupóstinn,“ sagði forstöðumaður Caves of Hella og hló. „Við vissum alltaf að Víkingaveislan væri eftirminnileg — en þetta er alveg nýtt fyrir okkur.“

Til að heiðra uppátæki gestanna var þeim boðinn ævilangur frír aðgangur að Hellunum á Hellu — enda þótti framtak þeirra einstakt.

Hellarnir á Hellu eru taldir með elstu fornleifum á Íslandi og hafa lengi heillað sagnfræðinga, ferðamenn og ævintýraunnendur sem leita svara við dulrænum uppruna hellanna. Samstarfið við Hótel Rangá með veislurnar hefur lyft upplifuninni enn hærra — þar sem saga, matargerð og upplifun renna saman í eitt ógleymanlegt kvöld.

Nú varpar þessi óvænta húðflúrssaga ljósi á nýja strauma í ferðaþjónustu, húðflúrferðamennsku (e. tattourism), þar sem gestir vilja ekki bara sjá landið, heldur tengjast því svo djúpt að minningin verður hluti af þeim sjálfum.

Bókstaflega.