Grænihryggur Gönguleið

Leiðin að Grænahrygg hefst við Fjallabaksleið nyrðri, við rætur Kirkjufells. Frá veginum liggur leiðin fyrst inn í Halldórsgil. Gengið er út úr gilinu fyrir botni þess og um leið hækkar landið smám saman. Er þá komið fram á gilbarma Sveinsgils og á góðum dögum er hér tignarlegt útsýni út eftir áreyrum Jökulsgilskvíslar. Leiðin liggur um stund meðfram Sveinsgili, en loks er farið niður í gilið og þar niðri þarf að vaða yfir á sem getur verið bæði köld og straumþung. Stefnan er í kjölfarið tekin upp hrygginn í miðju gilinu og nú taka við 2 km af nær samfelldri hækkun. Lokakaflinn er svo nokkuð brattur niður í mót þar sem Grænihryggur blasir við handan gils. Til að komast að hryggnum þarf að fara niður í gilið og vaða þar ána, en hægt er að sleppa því og spara um leið orku fyrir gönguna til baka. Grænihryggur er sannarlega náttúruperla í heimsklassa. Gangið ekki né hjólið á hryggnum til að hlífa honum.