Fara í efni

Eða prófaðu að leita eftir flokki og/eða staðsetningu

Kínverskir fjölmiðlar og áhrifavaldar kynntust Suðurlandi

Fyrsta áætlunarflug Air China frá Peking kom til Keflavíkur 26. október 2026. Flogið er þrisvar í viku með viðkomu í Kaupmannahöfn og er þetta fyrsta reglubundna flugtenging Íslands við meginland Kína. Tengingin bætir aðgengi frá Kína og öðrum Asíumörkuðum og skapar ný tækifæri fyrir ferðaþjónustu um allt land.

Af þessu tilefni skipulagði Íslandsstofa, undir merkjum Visit Iceland, fjögurra daga kynningarferð dagana 26. til 29. október fyrir 14 manna hóp blaðamanna, áhrifavalda og fulltrúa almannatengsla frá Kína. Hópurinn heimsótti Reykjanes, Reykjavík og Suðurland í samstarfi við Keflavíkurflugvöll, Markaðsstofu Reykjaness, Visit Reykjavík, Markaðsstofu Suðurlands og fjölda ferðaþjónustufyrirtækja. Arctic Adventures sá um akstur og leiðsögn.

Dagur á Suðurlandi

Miðvikudagurinn 28. október var helgaður Gullna hringnum og Suðurlandi. Dagurinn hófst á Þingvöllum, þar sem hópurinn kynntist jarðfræði svæðisins og sögu Alþingis. Við Laugarvatn sýndi Laugarvatn Fontana hvernig rúgbrauð er bakað í jarðhita og fengu gestir að smakka það nýbakað. Þá var haldið á Geysissvæðið, þar sem Strokkur gaus, og síðan að Gullfossi.

Í Friðheimum kynntist hópurinn fjölskyldufyrirtæki sem ræktar tómata í gróðurhúsum með jarðhita og endurnýjanlegri orku. Deginum lauk í Laugarás Lagoon, sem opnaði árið 2025, með baði og kvöldverði á veitingastaðnum Ylju, þar sem matseðillinn byggir á hráefni og ylrækt úr héraði.

Á einum degi fékk hópurinn því að kynnast heimsminjum, jarðhita, fossum, matarhefðum, ylrækt og nýrri vellíðunarupplifun.

 

Vaxandi markaður

Samkvæmt Ferðamálastofu fóru 139.402 kínverskir ferðamenn um Keflavíkurflugvöll frá október 2025 til september 2026. Það er 16,8% aukning frá árinu á undan, og Kínverjar voru 6,2% allra erlendra ferðamanna. Sumarið 2026 dvöldu kínverskir ferðamenn um þriðjungi lengur en sumarið áður, á sama tíma og meðaldvöl erlendra ferðamanna styttist. Um 81% erlendra ferðamanna heimsóttu Suðurland það sumar.

Ný flugtenging og vaxandi áhugi skapa tækifæri fyrir ferðaþjónustuna á Suðurlandi til að ná betur til kínverskra gesta, og ferðir sem þessi koma fjölbreyttu framboði svæðisins á framfæri.