Baðlónin á Suðurlandi: böð, matur og umhverfi

Jarðhiti á Suðurlandi á sér langa sögu til baða og slökunar. Gamla laugin á Flúðum, elsta sundlaug landsins, var gerð árið 1891 og á Laugarvatni hefur gufubað verið nýtt yfir sjóðandi hver síðan um 1930. Á síðustu árum hefur þessi menning hins vegar tekið stórt stökk. Fjölmörg ný baðlón af öllum stærðum og gerðum hafa litið dagsins ljós, þar sem heit lón, gufuböð, kaldir pottar og hágæða veitingastaðir renna saman í eina heildræna vellíðunarupplifun fyrir gesti.

19.10.2026

Gestur stendur í Laugarvatni við Laugarvatn Fontana og himinninn speglast í vatninu.

Fjölgun baðlóna á Suðurlandi hefur verið fremur hröð undanfarin ár. Á rúmum þremur árum hafa þrjú ný baðlón opnað á Suðurlandi: Hálendisböðin í Kerlingarfjöllum, Laugarás Lagoon í Laugarási og nú síðast Reykjaböð við Hveragerði. Á sama tíma hefur Laugarvatn Fontana verið endurbyggt og stækkað. Í dag eru fimm baðlón starfandi í landshlutanum, frá Hveragerði og alla leið upp á hálendið, og fleiri eru í undirbúningi, meðal annars í Hveradölum í Ölfusi þar sem stefnt hefur verið að opnun árið 2028.

Laugar Laugarvatn Fontana sem ná út í Laugarvatn, með fjöllin handan vatnsins

Laugarás Lagoon með mosavöxnum boga og brúnni yfir Hvítá í baksýn

Gestur í heitri laug Hálendisbaðanna í snæviþöktum Kerlingarfjöllum

Baðið sjálft er þó aðeins hluti af heimsókninni. Lónin eru byggð inn í umhverfi sitt og tengjast því sem er í kring: Reykjaböð standa þar sem gengið er upp í Reykjadal, Laugarás Lagoon á bakka Hvítár, Fontana við Laugarvatn og Hálendisböðin í fjallasal Kerlingarfjalla, þar sem gönguleiðir liggja um jarðhitasvæði Hveradala. Öll lónin reka veitingastað með áherslu á hráefni úr héraði og víða er fleira í boði. Í Reykjaböðum er hægt að bóka nudd og aðrar meðferðir, á Fontana fá gestir að smakka hverabakað rúgbrauð og á Highland Base er hægt að gista og fara í leiðsagðar göngur. Heimsókn í baðlón verður þannig oft hluti af lengri degi á svæðinu, og flest lónin eru opin allt árið.

Baðlónin

Reykjaböð, Hveragerði

Reykjaböð opnuðu í september 2026 við mynni Reykjadals í Hveragerði, þar sem gönguleiðin upp að heita læknum hefst. Aðallónið er tæpir 900 fermetrar og vatnið um 38 gráður. Umhverfis lónið eru gufubað, kaldir pottar við tvö hitastig og Kneipp-laug með sjávarsteinum þar sem gengið er á milli heits og kalds vatns. Í baðhúsinu er boðið upp á nudd og aðrar meðferðir og á staðnum er veitingastaður, bar ofan í lóninu og svið fyrir viðburði á borð við tónleika og flotstundir. Reykjaböð henta vel fyrir þá sem vilja sameina göngu í Reykjadal og slökun í sömu ferðinni.

Laugarás Lagoon, Laugarási

Laugarás Lagoon opnaði 15. október 2025 á bakka Hvítár í Laugarási, skammt frá Skálholti á Gullna hringnum. Lónið er um þúsund fermetrar á tveimur hæðum og gestir ganga á milli hæða í gegnum foss. Byggingin er lágreist með úthagagrasi á þakinu og á útisvæðinu eru tvær saunur, kaldur pottur og heitur pottur í skógarrjóðri. Veitingastaðurinn Ylja, undir stjórn Gísla Matthíasar Auðunssonar, leggur áherslu á hráefni frá bændum og smáframleiðendum í nágrenninu.

Laugarvatn Fontana, Laugarvatni

Á Laugarvatni hafa gufuböð staðið yfir hver frá því um 1930 og Fontana opnaði þar sem heilsulind árið 2011. Eftir umfangsmiklar endurbætur opnaði Fontana á ný árið 2026 með nýrri saunu með stórum útsýnisglugga, endurnýjuðu gufubaði beint yfir hvernum og nýjum laugum sem ná út í Laugarvatn. Gestir geta kælt sig í vatninu á milli gufuferða og smakkað rúgbrauð sem bakað er í heitum sandinum við lónið.

Hálendisböðin, Highland Base Kerlingarfjöllum

Hálendisböðin eru í Ásgarði í Kerlingarfjöllum, um 700 metra yfir sjávarmáli. Þau eru hluti af Highland Base, þar sem er hótel, skálar, tjaldsvæði og veitingastaður á gamla skíðasvæðinu í Kerlingarfjöllum. Í böðunum eru heitar laugar, kaldur pottur, sauna og bar með útsýni yfir fjallgarðinn. Böðin eru kærkominn endapunktur eftir göngu um litrík jarðhitasvæði Hveradala. Á sumrin geta dagsgestir keypt aðgang, en Highland Base er opið allt árið og á veturna er komið þangað í skipulögðum ferðum.