Aðalfundur og árshátíð 2025 - takið daginn frá!

Nú er loksins komið að því! Árshátíð og aðalfundur Markaðsstofu Suðurlands fer fram föstudaginn 16. maí á Hótel Geysi. Hér er kjörið tækifæri til að hittast og gleðjast saman áður en háannatími ferðaþjónustunnar hefst.

Dagskrá:

12:30-14:00 Aðalfundur Markaðsstofu Suðurlands
Súpa verður í boði Markaðsstofunnar frá kl. 12.

14:00-16:00 Vinnustofa um stafræna hæfni og gervigreind
Fræðsla á mannamáli um hagnýtingu gagna og nýtingu gervigreindar í ferðaþjónustu. Á vinnustofunni kynnast þátttakendur aðferðum til að hagnýta gervigreind í sínu starfi undir handleiðslu Brynjólfs Borgars Jónssonar hjá Datalab . Vinnustofan er haldin í samstarfi við Hæfnisetur ferðaþjónustunnar og SAF. 

16:00-18:00 Kynningarferð um nærsvæðið
Hristum hópinn saman og kynnum okkur nýjungar á svæðinu.

19:00 Kvöldið hefst með fordrykk
Kvöldið verður með aðeins óformlegra sniði en áður þar sem helsta markmiðið er að styrkja tengslanetið og njóta samverunnar yfir mat og drykk. Kvöldið hefst með fordrykk og forréttum í anddyri hótelsins. Aðalréttur verður svo borinn fram í veitingasalnum á og að honum loknum heldur gleðskapurinn áfram á Geysi Rooftop, glæsilegum veislusal á efstu hæð hótelsins.

Skráning:       Smelltu hér til að skrá þig

Hvar: Hótel Geysir
Hvenær: 16. maí
Verð: 16.900 krónur á mann. Innifalið í verði eru kaffiveitingar, vinnustofa, kynningarferð og þriggja rétta kvöldverður.

Gisting:

Gestir skulu sjálfir bóka gistingu hjá Hótel Geysi. Hótelið hefur tekið frá herbergi til 15. apríl. Eftir það fara herbergin í almenna sölu svo það er um að gera að bóka með góðum fyrirvara og taka fram að gistingin sé í samstarfi við Markaðsstofu Suðurlands. Sendið tölvupóst á geysir@geysircenter.is til að bóka herbergi.

Nánar um vinnustofu - Gervigreind og stafræn hæfni

Stafræn hæfni starfsfólks og fyrirtækja verður sífellt mikilvægari. Á vinnustofunni munum við fræðast um hvernig hægt er að meta stafræna hæfni vinnustaðar og hvað er hægt að gera til að bæta stöðuna. Einnig munum við fá sérfræðing á sviði gervigreindar til að fjalla um hagnýtingu hennar fyrir ferðaþjónstuna og fara yfir helstu tækifærin með þátttöku gesta í sal. Þátttakendur munu fá aðgang að glærum.

Fundarstjóri er Lína Björg Tryggvadóttir, byggðaþróunarfulltrúi í Uppsveitum Árnessýslu

Erindin eru eftirfarandi:

Jóhannes Þór Skúlason - Samtök Ferðaþjónustunnar
„Hvernig undirbúum við framtíð sem við náum ekki heilanum utan um“ 

Ólína Laxdal og Sólveig Nikulásdóttir, Hæfnisetur ferðaþjónustunnar
Ferðaþjónusta á nýjum tímum. Leiðir og lausnir til stafræns árangurs með Hæfnisetrinu.

Brynjólfur Borgar Jónsson, Datalab
Fræðsla og vinnustofa um nýtingu gervigreindar í ferðaþjónustu

Fyrri hluti

• Hugvekja um hagnýtingu gervigreindar (45 mín +10 mín í Q&A).
  - Fræðsla á mannamáli um hagnýtingu gagna og gervigreindar til að auka skilning fólks svo þau geti betur komið auga á tækifærin, fylgt hugmyndum sínum eftir með aðgerðum, tekið þátt í mótun aðgerða og í hagnýtum gagnaverkefnum á vegum síns vinnustaðar.
  - Hvað er gervigreind? Hvað getur hún gert fyrir mig, vinnustaðinn og samfélagið? Og hver eru þá næstu skef?
  - Hvaðan kemur þessi tækni, hver er geta hennar í dag og hvert stefnir hún?

Seinni hluti

• Kortleggjum tækifærin til að hagnýta gervigreind í ferðaþjónustu.
  - Hvar liggja tækifærin til að hagnýta gögn og gervigreind ferðaþjónustu? BBJ fjallar um topp 10 tækifærin og fær salinn til að taka þátt.
  - Vinnum áfram með topp 3 tækifærin: Hver er mögulegur ávinningur? Hvað þarf til og hver eru næstu skref?