Suðurland

Leita
Finnur þú það ekki? Prófaðu leitina :)

Heimamenn mæla með

  • Myndbönd frá Suðurlandi

    Myndir segja meira en mörg orð .... og myndbönd enn meira. Suðurland hefur svo margt uppá að bjóða sem erfitt er að lýsa eingöngu með orðum. Jöklar, eldfjöll, eldfjallaeyjur, háhitasvæði, jökulár, svartir sandar, gróin undirlendi, mýrar, stöðuvötn, ósnortið hálendi og svartar sjávarstrendur. 

    Skoða myndbönd

  • Afþreying á jökli

  • Matur og drykkur

  • Baðstaðir

  • Íslenski hesturinn

  • Myndir

FRÉTTIR

VIÐBURÐIR

Sjá viðburðadagatal

Suðurland, hreinleiki og kraftur

Forsíða
Jökulsárlón

Fyrir 1950 rann Jökulsá á Breiðamerkursandi beint undan jökli u.þ.b. 1½ km leið til sjávar. Síðan hefur jökullinn hörfað og sístækkandi lón myndast. Meðalrennsli árinnar er 250-300 m³/sek. og stórir ísjakar brotna af jökuljaðrinum og eru þeir á floti á vatninu. Lónið er feikidjúpt, a.m.k. 190 m. Áin styttist stöðugt vegna brimrofs og árið 1998 var hún varla meira en 500 m. Farvegur árinnar grefst stöðugt niður, þannig að það gætir sjávarfalla í lóninu. Það þýðir einfaldlega, að hlýrra vatn streymir inn í það á flóði og ísinn bráðnar mun hraðar en fyrrum. Bæði loðna og síld ganga inn í lónið og selurinn eltir ætið.

Víða má sjá æðarfugl syndandi milli jakanna. Það er ógleymanlegt að sigla með bátunum um lónið og virða fyrir sér litaskipti íssins og ótrúlegar höggmyndir náttúrunnar. Þar er rekin bátaútgerð fyrir ferðamenn og þar er lítið veitingahús. Áætlunarbifreiðar haf viðkomu við lónið á hverjum degi á sumrin, bæði í áætlun og dagsferðum tengdum Skálafellsjökli frá Höfn.

Afþreying

Á Suðurlandi geta bæði ungir og aldnir fundið eitthvað við sitt hæfi til dægrastyttingar og skemmtunar. Hestatengd ferðaþjónusta er óvíða meiri á landinu. Hér fylgir sagan gestum okkar við hvert fótmál, hér var alþingi Íslandinga á Þingvöllum, hér er sögusvið Njálu, hér sátu biskupar landsins í Skálholti. Á Suðurlandi má finna merk söfn, sögusetur, gallerí, handverkshús og fyrir þá sem vilja njóta dagsins utan dyra er hér góð stangaveiði í ám og vötnum, góðir golfvellir og sundlaugar, fallegar gönguleiðir fyrir þá sem vilja virkilega njóta útiverunnar.

Óvíða á landinu er náttúran stórbrotnari, fallegir fossar gleðja augað, heitir hverir spúa sjóðandi vatni, eldfjöllin eldi og eimyrju. Við búum í harðbýlu landi og höfum lært að lifa hér af, við bjóðum gestum og gangandi að njóta landsins okkar fagra og náttúrunnar með okkur heimafólkinu og ekki síður að stytta sér stundir við fjölbreytilega dægradvöl.

VÍK / Mýrdalshreppi

Kauptún austan Reynisfjalls í Mýrdal. Í Vík hafa verið tvö býli, Suður- og Norður-Vík, austan megin Víkurár, í litlu dalverpi við ströndina, og féll sjór að berginu beggja vegna dalsins langt fram eftir öldum. Vikið austan að Reynisfjalli nefndist Þórshöfn. Samgönguleiðir lágu yfir Reynisfjall til vesturs og Arnarstakksheiði til austurs eða inn úr Víkinni, sem kallað var, norður með Reynisfjalli, eftir lægðardragi milli þess og Arnarstakksheiðar. Í Kötlugosinu 1660 færðist ströndin austan Reynisfjalls mikið fram og opnaðist þá leið til austurs með hömrunum. Í Suður-Vík bjó Sveinn Pálsson (1762-1840) læknir og náttúrufræðingur í meira en 30 ár. Vík fékk löggildingu sem verslunarstaður árið 1887. Árið 1895 stofnaði Brydesverslun útibú í Vík. Við þetta gerbreyttust verslunaraðstæður Vestur-Skaftfellinga. Losnuðu þeir við langar og erfiðar ferðir vestur á Eyrarbakka, út í Vestmannaeyjar eða austur á Papós en einnig tóku Öræfingar og Eyfellingar að sækja verslun til Víkur.


Upp úr aldamótum varð kauptúnið í Vík miðstöð sýslunnar en jafnhliða því sem verslunin jókst fluttist þangað ýmis opinber þjónusta svo sem læknir og sýslumaður. Íbúum fjölgaði ört og voru þeir orðnir 80 árið 1905. Töluvert var róið frá Vík fram yfir 1930 og vöruflutningar voru allir með skipum þar til bílfært varð milli Víkur og Reykjavíkur.


Aðalatvinna íbúanna er verslun og ýmiss konar þjónusta við nærliggjandi byggðarlög svo og smáiðnaður.

Bretar og síðar Bandaríkjamenn höfðu nokkur umsvif í Vík á heimsstyrjaldarárunum. Þeir reistu lóranstöð á Reynisfjalli og eftir stríðið tóku Íslendingar við rekstri hennar. Var stöðin snar þáttur í atvinnulífi kauptúnsins uns hún var lögð niður í árslok 1977.
Prestssetur í Mýrdalsþingum hefur verið í Vík frá 1911. Kirkja var reist í kauptúninu á árunum 1931-1934, steinsteypt hús með kór og turni. Tekur hún um 200 manns. Víkurkirkja á ýmsa góða gripi, meðal annars altaristöflu eftir Brynjólf Þórðarson. Í kirkjunni eru einnig ýmsir merkir munir úr Höfðabrekkukirkju, sem fauk 1920, m.a. kaleikur og patína úr silfri frá 1759 eftir Sigurð Þorsteinsson silfursmið í Kaupmannahöfn og oblátuöskjur úr silfri frá 1732.

Heimild: Íslandshandbókin útgáfa 1995.

Reykjadalur

Reykjadalurinn er sannkölluð útivistarperla og ein flottasta gönguleiðin í Hveragerði. Volgar laugar og litrík hverasvæði gera landsvæðið að einstakri náttúruperlu sem enginn útivistarmaður ætti að láta fram hjá sér fara. Sundföt eru nauðsynleg með í för en heiti lækurinn er helsta aðdráttaraflið í dalnum. Þar er hægt að baða sig í læknum og það tekur u.þ.b. klukkustund að ganga að honum. Þaðan er svo hægt að halda áfram för sinni og ganga um Hengilssvæðið.

Gönguleiðin er vel merkt og skilti með kortum við byrjun hennar. Það eru brýr á leiðinni og passa þarf að fara ekki útaf af gönguleiðinni. Gönguleiðin byrjar við bílastæði efst í Hveragerði og fyrsti hlutinn liggur um svæði sem heitir Rjúpnabrekkur en þar er líka jarðhiti.

EYRARBAKKI / Árborg

Saga Eyrarbakka í hnotskurn: http://eyrarbakki.is/um-eyrarbakka

Fjaðrárgljúfur

Fjaðrárgljúfur er stórbrotið og hrikalegt, um 100 metra djúpt og um tveir kílómetrar að lengd. Gljúfrið er veggbratt, örlítið hlykkjótt og þröngt. Berggrunnurinn í Fjaðrárgljúfri er að mestu móberg frá kuldaskeiðum ísaldar og telst um tveggja milljóna ára gamalt. Fjaðrá á upptök sín í Geirlandshrauni og fellur fram af heiðarbrúninni í þessu mikilfenglega gljúfri þar til hún skilar sér niður í Skaftá. Fjaðrá er bergvatnsá og ljóst er aðhún hefur breyst mikið í tímans rás. Í dag er Fjaðrá oftast frekar vatnslítil og því geta göngumenn hæglega kosið að ganga inn gljúfrið en þá þarf að vaða ánna alloft, innst í gljúfrinu eru fossar svo ganga þarf sömu leið til baka. Flestir velja að ganga eftir göngustíg uppi á gljúfurbarminum og njóta um leið útsýnisins yfir gljúfrið. Fjaðrárgljúfur er á náttúruminjaskrá.

Myndun Fjaðrárgljúfurs

Talið er að Fjaðrárgljúfur hafi myndast við lok síðasta jökulskeiðs eða fyrir um níu þúsund árum. Þegar jökullinn hörfaði myndaðist lón í dalnum á bak við bergþröskuld en afrennslisvatn úr lóninu rann þar sem nú er Fjaðrárgljúfur. Jökulár frá jaðri jökulsins báru fram mikið af seti í lónið en áin sem rann frá því gróf sig niður í þröskuldinn og ofan í móbergið framan við hann. Þegar vatnsfallið var sem stærst var það öflugt við gljúfurgröftinn. Að því kom að stöðuvatnið fylltist af framburði jökulvatnanna og afl árinnar dvínaði. Þegar stöðuvatnið var orðið fullt hóf áin að grafa sig í setlögin sem hún hafði áður skilið eftir sig í dalnum. Malarhjallar beggja vegna í dalnum segja til um upphaflegu hæð og staðsetningu stöðuvatnsins og djúp rás í móberginu ber þögult vitni um afl náttúrunnar.

Örnefnið Fjaðrá hefur oft vafist fyrir mönnum en telja sumir að hér hafi eitt sinn verið fjörður og hafi áin borið nafnið Fjarðará í upphafi. Á þessu eru skiptar skoðanir og kannski búa ferðalangar yfir betri útskýringu á nafninu?

Upplýsingar um fleiri staði í nágrenninu: www.katlageopark.is

Urriðafoss

Urriðafoss er vatnsmesti foss landsins. Hér fellur Þjórsá fram af jaðri hins mikla Þjórsárhrauns (360 m3/sek) í fögru og friðsælu umhverfi. Fallhæð fossins er 6 metrar þar sem hann er hæstur. Þjórsárhraun, sem er eitt mesta hraun sem runnið hefur á jörðinni í einu gosi frá því að ísöld lauk, má sjá við Urriðafoss, þar sem fossinn steypist fram af austurbrún hraunsins. Lax gengur upp Þjórsá að fossinum og nokkuð upp fyrir hann. Urriðafoss er náttúrudjásn rétt utan þjóðvegs 1.

Áhugaverð söfn

Á Suðurlandi eru allskonar söfn og sýningar. Flest eru þau nokkuð hefðbundin og má þar nefna bóka- lista- og minjasöfn, önnur eru óhefðbundnari og eru tileinkuð eldgosum og ýmsu öðru forvitnilegu.

Gullfoss

Gullfoss er í raun tveir fossar, efri fossinn er 11 metrar og neðri fossinn 20 metrar.
Sigríður Tómasdóttir var fædd í Brattholti 1871, bærinn var þá afskekktur en þangað komu þó gjarnan ferðamenn.
Sigríður fylgdi of ferðamönnum að fossinum og lagði ásamt systrum sínum fyrsta stíginn að fossinum.
Þegar menn fóru að sækjast eftir yfirráðum fallvatna til virkjanaframkvæmda um aldamótin 1900 háði Sigríður harða baráttu gegn því að Gullfoss yrði virkjaður.

Seljalandsfoss

Foss í Seljalandsá þar sem hún steypist fram af hömrum Vestur-Eyjafjalla norðan við Seljaland.
Seljalandsfoss er á mörkum milli Seljalands og Hamragarða, einn af hæstu fossum landsins og horfir vel við á leið austur um Landeyjar. Gengt er á bak við fossinn. Mörgum þykir fossinn fegurstur í síðdegissól.
Heimild: Íslandshandbókin útgáfa 1995.

Heimild: Íslandshandbókin útgáfa 1995.

Katla Jarðvangur

Katla Jarðvangur

Í Kötlu jarðvangi eru margar merkilegar jarðminjar, sumar á heimsvísu. Yfir 150 eldgos hafa verið skráð þar frá landnámi. Eldvirknin hefur mótað landið og haft áhrif á búsetu manna eins og öskugosin í Eyjafjallajökli 2010 og Grímsvötnum 2011 sanna. Einstaklega kvik og síbreytileg náttúra hefur mótað sögu og mannlíf jarðvangsins í aldanna rás.

Katla jarðvangur nær yfir land þriggja sveitarfélaga, Rangárþings eystra, Mýrdalshrepps og Skaftárhrepps. Flatarmál hans er 9542 km2 eða rúm 9 % af heildarflatarmáli Íslands. Íbúafjöldi er um 2700 manns. Kvikfjárrækt hefur verið megin atvinnuvegur svæðisins en síðustu ár hefur kornrækt aukist. Hvolsvöllur, Vík og Kirkjubæjarklaustur eru helstu þjónustukjarnar fyrir sveitirnar. Undanfarin ár hefur mikilvægi ferðaþjónustu aukist gríðarlega í atvinnulífi svæðisins.

Jarðfræði

Ísland er á Mið-Atlantshafshryggnum þar sem tveir jarðskorpuflekar gliðna í sundur á svokölluðu rekbelti. Auk þess er möttulstrókur undir landinu með miðju undir Vatnajökli. Samspil rekbeltis og möttulstróks veldur flókinni og fjölbreyttri eldvirkni á Suðurlandi.

Sérstaða Kötlu jarðvangsins felst í þessari eldvirkni og víðfeðmum áhrifum hennar á landmótun og náttúrufar. Einkennandi eru megineldstöðvar, gígar og gossprungur, gervigígar, hraunbreiður, móbergsfjöll og móbergshryggir sem hafa sömu stefnu og rekbeltið. Eldstöðvakerfin Hekla, Katla, Grímsvötn og Bárðarbunga eru virkust við landmótunina.

Jöklar eru einnig áberandi í landslagi þar sem þeir þekja hæstu eldfjöll. Frá þeim falla skriðjöklar og jökulár. Jökulgarðar og jökullón eru einnig áberandi. Hamfaraflóð vegna eldgosa undir jökli mynduðu sandana á láglendi.

Elsta bergið er um 2,5 milljón ára gamalt og finnst við rætur Lómagnúps sem er gamall sjávarhamar og eitt hæsta standberg landsins (671 m). Aðrar áhugaverðar myndanir í jarðvanginum eru steingervingar í hnyðlingum og gjóskulög sem hafa reynst vel við aldursákvarðanir.

Þjóðgarðar

Þjóðgarðurinn Þingvöllum

Saga
Saga Íslands og íslensku   þjóðarinnar kemur hvergi betur fram á einum stað en á Þingvöllum við Öxará. Þar var Alþingi stofnað um árið 930 sem kom saman á Þingvöllum allt fram til ársins 1798. Meginviðburðir Íslandssögunnar hafa gerst þar og því skipa Þingvellir sérstakan sess í hugum allra Íslendinga. Þingvellir eru í dag friðlýstur helgistaður Íslendinga.

Náttúra
Á undanförnum áratugum hafa rannsóknir leitt í ljós að Þingvellir eru náttúruundur á heimsvísu þar sem jarðsagan og vistkerfi Þingvallavatns mynda einstaka heild.Það eru gríðarleg verðmæti og náttúruundur að geta fylgst með þróun og myndum nýrra tegunda á einum stað eins og í Þingvallavatni. Þingvallasvæðið er hluti flekaskila Atlantshafshryggjarins sem liggja um Ísland. Þar má sjá afleiðingar gliðnunar jarðskorpunnar í gjám og sprungum svæðisins.

Vatnajökulsþjóðgarður

Vatnajökulsþjóðgarður var stofnaður árið 2008. Hann nær yfir allan Vatnajökul og stór svæði í nágrenni hans, þar á meðal þjóðgarðana sem fyrir voru í Skaftafelli og Jökulsárgljúfrum. Þjóðgarðurinn spannar tæp 14% af flatarmáli Íslands (um 13.920 ferkílómetrar í júní 2014) og er á meðal stærstu þjóðgarða í Evrópu.

Þjóðgarðar eru friðlýst svæði sem teljast sérstæð vegna náttúrufars eða sögulegrar helgi. Sérstaða Vatnajökulsþjóðgarðs felst einkum í fjölbreytilegum landslagsformum sem samspil eldvirkni, jarðhita, jökuls og vatnsfalla hafa skapað.

Fylgdu okkur á Instagram#southiceland

Suðurland

Þéttbýliskjarnar

Á Suðurlandi eru allmargir þéttbýlisstaðir, hver með sínu sniði og sjarma og allir bjóða upp á einhverskonar afþreyingu. Selfoss er þeirra stærstur og þar má finna ýmsar verslanir, þjónustu og marga veitinga- og skyndibitastaði. Flestir bæir eru í alfaraleið og því bæði hentugt og skemmtilegt að eiga þar viðdvöl.

Skoða meira

Map Höfn Kirkjubæjarklaustur Vík Vestmannaeyjar Hvolsvöllur Flúðir Laugarvatn Reykholt Laugarás Borg Brautarholt Hveragerði Árnes Selfoss Hella Stokkseyri Eyrarbakki Þykkvibær Þórlákshöfn
Vestfirðir Vesturland Norðurland Austurland Suðurland Reykjanes Höfuðborgarsvæðið

Viltu skoða aðra landshluta?

Ísland hefur upp á margt að bjóða og hver landshluti hefur sína sérstöðu hvort sem um er að ræða áhugaverða áfangastaði, einstök náttúrufyrirbrigði, mannlíf eða þjónustu. Gefðu þér tíma til að skoða hvað önnur svæði hafa uppá að bjóða og skipulegðu ferðina með okkar aðstoð.