Áhugaverðir staðir

Á Suðurlandi eru mörg höfingjasetur og sögufrægir staðir. Úr Íslendingasögunum þekkjum við Oddaverja sem voru kenndir við Odda á Rangárvöllum en Oddi var að fornu mikils háttar menningar – og valdasetur. Þar var skóli Oddaverja, sem Sæmundur fróði Sigfússon ( 1056-1133 ) gerði frægan og höfuðból sonarsonar hans Jóns Loftssonar ( 1124-1197 ), valdamesta höfðinga landsins á sinni tíð. Hjá Jóni í Odda ólst upp Snorri Sturluson ( 1179-1241 ) sem ritaði meðal annars Heimskringlu og Snorra Eddu.

Þá eru hér söguslóðir Njálu og þar nefnum við til sögunnar Hlíðarenda og Bergþórshvol fornfræg höfðingjasetur. Þingvellir, þar sem alþingi Íslendinga til forna var háð, er helgur staður í huga íslensku þjóðarinnar. Í Skálholti var biskupssetur í aldir og þar hafa í gegnum tíðina staðið margar og merkar kirkjur.

Á Stöng í Þjórsárdal eru sýnilegar rústir af Sögualdarbæ sem mun hafa farið undir vikur í Heklugosi árið 1104. Árið 1974 var reist eftirlíking af bænum á Stöng sem nefndur er Þjóðveldisbærinn, stendur hann í fögrum hvammi undir Sámsstaðmúla í Þjórsárdal.
Á Suðurlandi eru flest stærstu raforkuver landsins og eru þau yfirleitt opin og til sýnis að sumarlagi fyrir gesti og gangandi.

Í Vestmannaeyjum, stærstu verstöð á Suðurlandi, eru minjar um Heimaeyjagosið 1973, vel sýnilegar í kaupstaðnum auk þess sem náttúran er þar fjölskrúðug og mjög falleg. Þar hefur verið reist stafkirkja að norskri fyrirmynd. Á miðri 17. öld voru eyjarnar vettvangur Tyrkjaránsins sem svo hefur verið nefnt, þegar Márar gerðu hér strandhögg, rændu fólki og fluttu með sér í ánauð til Alsír.
Eina sveitaþorp landsins er í Þykkvabæ, en þar er stunduð mikil kartöflurækt. Vor og haust er þar viðkomustaður farfugla á leið til og frá landinu, er algengt að sjá þar álftir saman í hundraðatali.